Politika  Berango 2017-04-05 10:49

Erabakitzeko eskubidearen aldeko bilera egingo dute barikuan, Berangon

Uribe Kostako gainontzeko udalerriei jarraituz, Berangok ere erabakitzeko eskubidearen aldeko bideari ekingo dio laster; izan ere, apirilaren 7an, barikuan, Gure Esku Dago taldea osatzeko eta herri-galdeketa egin behar den edo ez erabakitzeko bilera irekia egingo dute. Arrastiko 07:30ean ipini dute hitzordua, Berangoeta kultur etxean.

Berangoztarrek gogoratu dutenez, daborduko Euskal Herriko 73 herritan egin dira herri galdeketak; aurten, gainera, ehun herri baino gehiagotan egitea aurreikusita dago. "Denerako, 600.000 herritar baino gehiago bizi den eremuetara iritsiko dira galdeketak", azaldu dute. Gurean, gainera, herri askotan egingo dute kontsulta; lehenengoak Barrika, Gorliz, Plentzia, Sopela eta Urduliz izango dira, maiatzaren 7an egingo baitute herri-galdeketa. Azaroan ere bigarren olatu bat aurreikusten dela ohartarazi dute berangoztarrek.

Deitzaileek jakinarazi dutenez, galdeketa egin duten herri bateko kide bat gerturatuko da bilerara, bere esperientzia kontatzera. Ondoren, berangoztarrek euren asmoa zein den azalduko diete auzokideei. "Talde sustatzailearen proposamena begi onez ikusiz gero, argazki bat egin eta lanean hasiko gara", azaldu dute.

Berangok 560 sinadura behar ditu herri-galdeketa egin ahal izateko.

2017/04/07 19:30

Berangoeta kultur etxea. Berango

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa