Barikuan, hilaren 8an, 40 egun igaro ziren Alconzako makinak itzali eta greba mugagabeari ekin ziotenetik. Egun horretan, prentsaurrekoa eta manifestazioa egin zuten esateko ez dituztela onartuko Alconza-Irizar enpresak iragan astelehenean egikarituko 25 kaleratzeak, eta iragarri zuten borrokan jarraituko zutela Berangoko lantegiaren enpleguaren eta etorkizunaren alde.
Manifestazioa hasi duten leku berean amaitu dute, eta ozen aldarrikatu dute: "Alconzan ez dago inor soberan!". pic.twitter.com/xzozP7owd5
— Hiruka (@HirukaEus) April 8, 2022
Manifestazioaren amaieran, langileen bozeramaileetako batek azpimarratu zuen kaleratutakoak laneratu arte, gutxienez, greban jarraituko dutela, eta salatu zuen Irizar Taldeko zuzendaritzak ez duela "inoiz" negoziatzeko asmorik izan, "enpresaren egoera haien erantzukizuna denean". Era berean, hilabeteotan izandako herriaren babesa eskertu eta eguaztenean, apirilaren 13an, Berangoko frontoian izango den elkartasun jaialdian parte hartzeko deia egin zuen.
40 egun greba mugagabean daudenean, #Irizar Taldeak bultzatutako 25 langile kaleratzeak onartuko ez dituztela azpimarratu dute grebalariek gaur goizean.
— Hiruka (@HirukaEus) April 8, 2022
Guztira, 38 langile kaleratu gura ditu enpresak. pic.twitter.com/m7VSsQsMZ9
Elkartasun jaialdia
Greba mugagabea abiatu zutenetik hilabete eta erdi igaro dela eta, borrokari zabalkundea emateko musika jaialdia egingo dute etzi, eguaztenean. Berangoko frontoian jarri dute hitzordua, 19:30ean, eta bertan arituko dira Zetalau, Orreaga 778 eta Nazka musika-taldeak. Sarreraren prezioa 5 eurokoa izango da.
