Bitartean, Bilboko Instrukzioko 1. zenbakiko epaileak emandako ebazpena aintzat hartzeko eta, horretan oinarrituta, gazte biak absolbitzeko eskatu du Iñaki Carro gazteen abokatuak; orain ia bost urte, epaileak arrazoia eman zien Kalezuloko gazteei, beste auzi batean. "Testuingurua berbera da", adierazi du defentsako letraduak. Oraingo honetan, 300 eurotik gorako isun bana jarri gura diete akusatuei. Carrok, ordea, epaiketa berri hau "Kalezulo gaztetxearen hustea eta itxiera agintzeko aitzakia" izan daitekeela uste du. Gune autogestionatua hartzen duen eraikina lehiaketara aterata dago; prozedura horren administratzaileak aurkeztu zuen gazte bien aurkako salaketa.
Erandioko Gazte Asanbladak Udal Gobernuari leporatu zion urtarrilaren 10ean herriko gazte biren aurkako auziaren eta Kalezulo gaztetxea ixteko saiakera baten atzean egotea. Egun bi beranduago, EAJk eta PSE-EEk osatzen duten Udal Gobernuak gezurtatu zituen adierazpen horiek. HIRUKAri igorritako bost puntutako komunikatu labur batez, Udalak adierazi zuen ez diola "inoren eta ezeren aurkako neurririk hartzeari ekin. Lokal-lursail-eraikinaren jabea izan da egin duena". Gaur aurkeztutako polizia-atestatua, ordea, Erandioko Udaltzaingoak helarazi diola adierazi du fiskalak.
