Taldeko kideek azaldu dutenez, erandioztarrak ohituta daude horrelako gertakizunetara: "Bizitza osoan itsasadarreko uragaz bizi izan gara, bai saneamenduaren eraginez, bai marea bizien bidez ere". Hala ere, gertakizuna baliatu gura izan dute ohartarazteko beraien kezka nagusia aurreikuspen falta eta etorkizuneko planen eza dela, daborduko itsasontzi handien trafikorako itsasadarra dragatzen ez denez, "itsasadarrak hamarkadak daramatzalako sakonera galtzen eta husteko gaitasuna murrizten".
Gaineratu dutenez, "40 urte bete dira 1983ko uholde larrietatik, orduan itsasadarrak ez zuen gainezka egin Erandio Basamortun, baina orain, egoera honegaz, zer gertatuko litzateke?".
Arazo horrek daborduko Gasolinoaren zerbitzuari eragiten diola deitoratu dute, itsasbehera batzuetan zerbitzua etenda egotera derrigortuta baitaude, itsasontzientzako hondo nahikorik ez dagoelako.
Halaber, gogoratu dute hilaren amaieran beste marea bizi bat egongo dela, "espero dezagun osagai ziklonikorik ez izatea, astronomikoaz gain, horregaz mareak nabarmen egiten baitu gora".
Marea biziak eguzkia, ilargia eta lurra lerrokatuta daudenean gertatzen den fenomenoa da, non mareek ohikoa baino alde gehiago hartzen dute. Fenomeno hau hilero errepikatzen bada ere, badira muturrekoagoak diren bi aldi: iraila-urria eta otsaila-martxoa.