Bihar, hilak 7, "Las Lisystratas" antzezlana egongo da ikusgai Areetako Andres Isasi eskolan, 19:00etan, hiru euroren truke.
Martxoaren 8an, domeka, bi hitzordu egingo dituzte, Algortan eta Itzubaltzeta/Romon. Lehenengoan, Bilgune Feminista, Ernai, Haziak eta Mujeres con Voz emakume taldeek 11:00etan hasiko dute eguna San Nikolas enparantzan. Bertan zaintzaren inguruan eztabaidatuko dute; ondoren, 12:30ean txokolateagaz eztarriak berotuko dituzte eta 13:00ak aldera manifestazioa abiatuko dute San Nikolas enparantzatik, Algortako kaleetan emakumeen parekidetasuna aldarrikatzeko. Ordu berean, Itzubaltzetako emakumeon asanbladak kontzentrazioa deitu du Areetako Xake plazan.
Martxoaren 9an, astelehena, berriz, “Berdintasuna hazi eta hezi” izeneko mahai-ingurua egingo dute Algortako Villamonte kultur etxean, 18:30ean. Hurrengo egunean, martitzenean, “Trilogia del Baztan. Las sombras de la maternidad” inguruko hitzaldia egingo dute Josune Muñoz literatura kritikariagaz. Hitzordua 19:00etan jarri dute, Villamonte kultur etxean.
Azkenik, eguenean, hilak 12, "Emakumeak kontatzen" ipuin-kontaketa egingo dute euskaraz, Apikagaz. Interesatuek 18:00etan hurbildu beharko dute Villamonte kultur etxera.
Aurten, gainera, Udalak hezkidetza areago zabaldu gura du, ikastetxe batzuekin batera, haien esperientzietan aurkitzen dituzten eragozpenak eta erronkak azaltzeko. Udalaren aburuz, hezkuntzan “emakumeen eta gizonen berdintasunerantz” aurrerapen handiak egin diren arren, oraindik “bide luzea” dago egiteko.