Egun hauetako ekitaldiei dagokienez, ostera dator Oheak: Getxoko argazkigintza-festibalak zinemari eskaintzen dion jarduera. Film on bat egundoko gune batean ikusteko aukera emango du jarduerak, eta modurik erosoenean gainera; ohean etzanda. Irailaren 14ra arte 15 ohe bikoitz ipiniko dituzte Begoñako galerietan, eta Christian Petzold zuzendari alemaniarraren "Phoenix" filma proiektatuko dute. Oheak pertsona birentzako dira, baina izena banaka eman daiteke eta ohea beste pertsona bategaz partekatu. Berokia edo manta eroatea gomendatu dute antolatzaileek.
Bestalde, irailaren azken-aurreko aste-akabuan gaueko ibilaldiak egingo dituzte lehenengo aldiz. Ordu eta erdiko iraupena edukiko dute; argazkilarien lanetara hurbiltzeko ezohiko modua ahalbidetzea dute helburu. Bisitariakaz gune berria partekatzea da asmoetako bat, bestea, edizio honetan jorratzen dabiltzan Bidaiak gaiari bestelako ikuskera eskaintzea da. Bisita amaitu eta gero, edontzi-azpikoak ikustera hurbil daitezen animatuko dituzte parte-hartzaileak.
Amaitzeko, iraileko azken zapatu bietan "Ikusi Makusi" izeneko jarduera hartuko du Getxoko Nazioarteko Argazkigintza Jaialdiak. Umeentzat bereziki prestaturiko ibilaldia da; jaialdiko erakusketa batzuk ezagutzeko bisitaldi gidatua, irudien edukiaren eta lan-prozesuaren inguruko azalpenakaz amaituko da. Umeek pertsona heldu bategaz joan beharko dute.
Ekitaldi batzuk
- Oheak
Irailaren 8tik 14ra
Emanaldi bi eguenetik zapatura (20:00 eta 22:00). Emanaldi bakarra domekatik eguaztenera (22:00). Doan.
- Gaueko Ibilbideak
Irailak 16 eta 17
20:30 Begoñako galeriak (sarrera, Ereaga hondartzatik). Sarrera: 3 euro.
Esku-argia eroatea beharrezkoa da.
- Zarauzko Photomuseum-era
Irailak 17, zapatua
09:30 Irteera, Algortatik. 14:15ean, itzulera. Salneurria: 18 euro.
- Ikusi Makusi
Irailak 17 eta 24
18:00 Getxophotoren informazio-gunea (Amezti 4, Algorta). Salneurria: 2 euro.
Ezinbestekoa da aurretik izena ematea.