Hazte Oir elkarte espainiar ultrakatolikoaren kanpainaren autobusa Getxora etorriko dela uste dute. Hori dela eta, Getxoko Guardiako Epaitegiari horren berri eman dio gaur goizean Imanol Landa Getxoko alkateak; autobusak araudi penala urratzen ote duen aztertzeko ere eskatu dio. Autobusa etortzekotan, epaileak herrian ez sartzeko erabakia har dezala gura du agintari getxoztarrak, "hori ez litzatekeelako herritarren arteko bizikidetzaren aldekoa izango".
Aldi berean, duela aste batzuek aipatutako elkarteak autobusaren bitartez izaera transexualen eta sexu aniztasunaren kontra abian jarritako kanpainaren aurka agertu da berriro ere Imanol Landa.
Landak gogoratu du Getxo udalerri irekia dela, aniztasunaren aldekoa, eta tolerantea sexu-aukera guztiakaz, eta berdintasunaren kontrako edo izaera sexualagatik pertsonekiko gorrotoa eta bazterketa zabaltzen duten kanpainen aurkakoa.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
