Zenbateko horretatik, Udalak 63.360 euro banatuko ditu euskara ikasteko gizabanakoei zuzendutako diru-laguntzen artean eta beste 7.000 euro enpresei bideratutakoen artean. Hain zuzen ere, 55.360 euro euskara ikasi gura eta baliabide ekonomikorik ez dutela frogatzen duten getxotarrentzat izango dira. Aurtengo berritasuna izango da familia unitate eskatzaileen gehienezko diru-sarrerak areagotu egin direla, herritar gehiagok eskatu ahal dezaten laguntza. Kasu horietan eskaerak aurkezteko epea irailaren 30ean amaituko da.
Bestalde, Udalak 1.000 euro onartu ditu Udaleko eta erakunde autonomoetako langileek eta zinegotziek euskara ikasteko. Eskaerak aurkezteko epea irailaren 30ean amaituko da. 6.000 euro izango dira gidabaimena ateratzeko azterketa euskaraz egiten duten 17 eta 23 urte bitarteko gazteentzat. Kasu horietan eskaerak aurkezteko epea abenduaren 31n amaituko da.
Beste 1.000 euro elkarteetako aisialdiko begirale eta zuzendari agiria euskaraz lortzeko izango dira, eta eskaerak aurkezteko epea abenduaren 31n amaituko da.
Azkenik, 7.000 euro bideratuko dira, errotuluak, pertsianak, biniloak eta ibilgailu komertzialak euskaraz ipintzeko. Eskaerak aurkezteko epea abenduaren 31n amaituko da enpresentzat.
2016an euskara ikasteko 163 laguntza eman ziren; 36 laguntza gidabaimena ateratzeko azterketa euskaraz egiteko; aisialdiko begirale eta zuzendari agiria lortzeko laguntza bakarra, eta 30 errotulu eta elementu ipini ziren euskaraz (18 euskara hutsean eta 12 euskaraz eta gazteleraz).
Diru-laguntza horiekaz batera, Udalak beste zerbitzu batzuk mantenduko ditu euskararen erabilera sustatzeko helburuagaz, tartean, herriko elkarteei eskaintzen dizkien itzulpen zerbitzua; aholkularitza eta ekitaldietarako aurkezle euskaldunen zerbitzua; eta Getxoko merkatariei nahiz ostalariei doan eskaintzen dizkien itzulpen eta maketazio zerbitzuak.