Jendartea  Getxo 2017-04-05 18:48

Udalerrian segurtasun arazorik ez dagoela dio Getxoko alkateak

Getxoko segurtasuna "zalantzan" ipini izan da azken egunotan sare sozialetan eta komunikabideetan. Salatzen denez, "Juntilla Mala" izeneko gazte-talde bat ibili ei da Neguri eta Areeta artean, "bertako gazteak izutuz". Horren aurrean, Imanol Landa Getxoko alkateak argitu gura izan du ustezko "segurtasun eza" hori agerian utz lezaketen datu objektiborik ez dagoela. Era berean, salatu duenez, aipatutako ezinegon hori "estetika zehatza" daramaten gazte batzuen jarduerek sortu dutela. Horrek zurrumurruak hedatzea eragin du, "sareetan arduragabekeriaz zabaldu direlako".

Udalerrian segurtasun arazorik ez dagoela dio Getxoko alkateak
Getxoko udaltzain bat zaintza lanak egiten, artxiboko irudian. | Ikusi handiago | Argazki originala

Imanol Landa alkateak azaldu duenez, Getxoko Udaltzaingoak udalerriko gune guztietan pertsona-talde denen arteko bizikidetza "segurtatzeko" zaintza-lanak egiten ditu egunero, Ertzaintzagaz batera. "Egonezin hori sortu zenetik, Udaltzaingoak lanok areagotu ditu gazteen artean arazoak sor litezkeen tokietan eta ordutegietan, eta orain arte, ustezko 'segurtasun eza' hori agerian utz lezaketen datu objektiborik ez da egon", gaineratu du. Era berean, gaineratu du 50.000 biztanle baino gehiagoko sei udalerririk seguruen artean dagoela Getxo, Eusko Jaurlaritzako Segurtasun Sailak egindako Euskadiko Delinkuentziaren memoria aipatuta. "Getxo udalerri segurua da eta horrela hartzen dute gure herritarrek, azken urteotako asebetetze inkesten datuen arabera. Udalak, beraz, tinko jarraitzen du auzo guztietan udalerri seguru mantentzeko konpromisoarekin, eta horregatik herritarrek segurutzat ere jotzen dute herria", azpimarratu du Landak.

Aipatutako ezinegona "estetika zehatza" daramaten gazte batzuen jarduerek sortu dutela uste du alkateak. Horrek denak zurrumurruak hedatzea eragin du, gizarte sareetan "arduragabekeriaz" zabaldu direlako, deitoratu du. "Udala duela urte asko elkarbizitza eta kohesio soziala kaltetzen dituzten zurrumurruekin, estereotipoekin eta aurreiritziekin amaitzeko lan egiten ari da, era aktiboan".

Gainera, ikusmiran jarritako gazteak adingabeak direla jakinarazi du alkateak, eta horregatik babesteko eskubideak dituztela azaldu du. Hala ere, gertakariren bat frogatuko balitz, heziketa sozialeko neurriak hartu beharko liratekeela agindu du.

Amaitzeko, sare sozialen erabiltzaileei eta alderdi politikoei erantzukizunez jokatzeko eskatu die Landak, "zurrumurruak edo sasi-informazioak ez elikatzeko, horrek ekar ditzakeen ondorio negatiboengatik".

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa