Jendartea  Getxo 2017-04-06 14:50

Txakurrak solte ibiltzeko ordutegia zabaldu du Getxoko Udalak

Getxon baimenduta dauden aisiarako eremuetan txakurrak lotu gabe ibiltzeko ordutegia zabaldu du Udalak, 18:00etatik goizeko 11:00ak arte. Hartara, bost ordu gehiagoz ibili ahalko dira txakurrak solte, orain arte ordutegi hori 21:00etatik 09:00etara mugatuta baitzegoen.

Txakurrak solte ibiltzeko ordutegia zabaldu du Getxoko Udalak
Txakur bat solte, artxiboko irudian. | Ikusi handiago | Argazki originala

Animaliak Edukitzea eta Babestea arautzen duen Udal Ordenantzak finkatzen ditu txakurrak solte eraman ahal izateko leku horiek. Ordenantzaren arabera, txakurrak lotu gabe baina kontrolpean ibili ahal dira aipatutako eremuetan, eta kanpoan uzten dira arriskutsutzat katalogatuta dauden txakurrak.

Ordutegi berriak ezartzen du txakurrak 18:00etatik hurrengo eguneko 11:00ak arte ibil daitezkeela lotu gabe ohiko zonaldeetan; udaldian, baina, animaliak ezingo dira hondartzetatik aske ibili.

Udalean ordezkaritza daukaten talde politiko denek babestu dute neurria. José Luis Landa Ingurumen zinegotziak azaldu duenez, hainbat proposamen eta iradokizun jaso dira maskota-jabeen aldetik ordutegia hedatzeko eskatuz, beren animaliek “mugitzeko askatasun” handiagoa eduki dezaten. Landaren esanetan “neurri egokia dela iruditzen zaigu. Izan ere, txakurren jabe gehienak herritar arduratsuak dira eta primeran zaintzen dituzte beren animaliak”.

Bost dira ordenantzak finkatzen dituen aisiarako eremuak (lorategiak eta parterreak salbuetsita daude): Txurrukako kaia eta Areetako hondartza; Portu Zaharreko zelaigunea eta Ereagako hondartza; Arrigunagako hondartza; Gobela ibai ondoko pasealekua (Gobeloki, La Avanzada errepidetik Lexarretaraino) eta Makaleta etorbidea (Lexarretatik Salsidu etorbideraino); eta Galeako bidea (Aixerrotatik Sopelako mugaraino).

Higiene- eta osasun-neurriak direla eta, Areeta, Ereaga eta Arrigunagako hondartzak ezin izango dira erabili aisiarako eremu moduan uda garaian, (maiatzetik irailera bitartean).

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa