Kirolak  Getxo 2017-04-12 14:00

Getxo Kirolak-ek 27.000 abonatu izan zituen iaz

Getxo Kirolak udal-erakundeak 27.103 abonatuakaz itxi zuen 2016ko ekitaldia. Kopuru hori 2015. urtekoaren oso antzekoa da, %0,72ko galera baita 2015eko 27.300 bazkidegaz alderatuta. Hala, erakundeak eutsi egin dio 2008tik izan den abonatu kopuruaren igoerari, orain 9 urte baino 4.000 inguru gehiago baitaude.

Getxo Kirolak-ek 27.000 abonatu izan zituen iaz
Boleibol partida bat, Fadurako kiroldegian. © GETXOKO UDALA | Ikusi handiago | Argazki originala

Getxo Kirolak-en jarduera-txostenetik ateratako datuen arabera, jende ugarik parte hartu du kirol-jardueretan, amateur-, eskola- eta federatu-mailetan; eta instalazioak asko erabili dira.

Álvaro González Kirol zinegotziak onartu duenez, "urte zaila izan da Gobela ibaiaren ibilgua zabaltzeko obrak direla eta, Faduran izandako kalteak medio. Obrak, jakina, beharrezkoak ziren ingurunean uholde-arriskua murrizteko, baina udalerriko kiroldegi handirako sarrera ez ezik, zerbitzuak ere zaildu eta mugatu dituzte. Hala ere, hilabete hauetan jasotako datuen arabera, bertoko kirol-komunitateak aurreko denboraldietan bezain sendo eta jendetsu izaten jarraitzen du". 

Neguko eta udako kanpainetan, 6.247 lagunek parte hartu zuten Fadura eta Gobela kiroldegietan emandako kirol-ikastaroetan. Eta horiei fitness eta muskulazioko gimnasioetan izena emandako 1.700 lagun inguru gehitu behar zaizkie. Eskola-kirolari dagokionez, Lehen Hezkuntzako 2.100 ikasle inguruk parte hartu zuen Kirol Anitza eta igeriketa-programetan. Gainera, kirol federatuan, Fadura, Gobela eta Andra Mari kiroldegietako instalazioetan 4.600 lehiaketa gauzatu ziren; lehiaketa horietan 61.000 kirolarik baino gehiagok parte hartu zuten, 125.000 ikusle inguru bildu zen eta beste 5.500 boluntario aritu ziren jarduerak antolatzen.

Instalazioen alokairuari dagokionez, padel-pistak erabili ziren gehien (urtean 10.228 ordu), eta haien atzetik tenis-pistak (6.192 ordu) eta frontoiak (2.124 ordu).

Txosten ekonomikoa

Getxo Kirolak erakundeak, 2016. urtean, 9,2 milioi euro inguruko aurrekontua izan zuen; zenbateko horretatik, 3,6 milioi euro baino gehixeago tasen eta beste diru-sarrera batzuen bitartez jaso zuen. Klubei eta tokiko kirolariei ematen zaizkien laguntzei dagokienean, 1,1 milioi euro banatu zituen. Horrela, horietatik 495.000 euro kirol federaturako izan ziren; 211.000 euro udalerri-eremuko kirol-eskolentzat; 237.000 euro ekitaldiak antolatzeko; eta gainerakoa bertako kirolerako, herri-jaietako kirol-jardueretarako eta muturreko kiroleko ekimenetarako.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa