Plataformak azpimarratu du Galder Barbado eta Aitor Zelaiaren kontrako prozesua erabat politikoa izan dela eta euskal militanteak izateagatik zigortu gura dituztela. Joan den maiatzean berretsi zituzten gazte arabar bien aurkako lau urteko espetxe-zigorrak. Hilabete lehenago epaien helegiteak iritsi ziren Espainiako Auzitegi Gorenera, urte biko itxaronaldiaren ostean; horietan, defentsak Barbadoren eta Zelaiaren absoluzioa eskatu zuen. Fiskaltzak, baina, zortzi urteko espetxe-zigor eskaera aplikatzea eskatu zion Auzitegi Gorenari eta horrek, bere aldetik, Audientzia Nazionalak jarritako lau urteko kartzela-zigorra berrestearen alde egin zuen.
Orain dela lau urte, 2019an, abiatutako prozedura judiziala amaitu da jasotako espetxeratze-aginduagaz. Urte hartako otsailaren 7an atxilotu zituzten Barbado eta Zelaia, "material lehergarriak" zituen bidoi bat "helburu terroristakaz" gordetzea egotzita. Ia sei hilabete egon ziren prebentziozko espetxealdian, eta 2021eko urtarrilean epaitu zituzten Audientzia Nazionalean, Madrilen.
Egoera salatzeko asmoz, mobilizazio jendetsuak egin zituzten astelehenean, hilaren 18an, Amurrion, Agurainen eta Gasteizen. Hurrengo zapatuan, hilaren 30ean, berriz, manifestazio nagusia egingo dute Gasteizen, 18:30ean, Artiumetik abiatuta. "Dei egiten diogu Euskal Herriari herriz herri datozen asteetan mobilizatzera eta elkartasun keinuak biderkatzera", adierazi dute plataformako kideek.
Irailaren 30ean mobilizazio nagusia egingo dugu 18:30etan Artiumetik abiatuta. Ekarri elkartasun kamiseta!
— ANkerkeriariStop (@ANkerkeriaSTOP) September 15, 2023
#ANkerkeriariSTOP#AitorEtaGalderASKE #EuskalHerriakAURRERA pic.twitter.com/XAfoMCJgZy