Apirilaren 6an, Athletic Clubek eta R.C.D. Mallorca taldeek jokatuko duten Errege Kopako finalaz gozatzeko, Getxoko Udalak gune berezi bi prestatu ditu Itzubaltzeta/Romoko Santa Eugenia plazan eta Algortako Telletxe plazan. 2015ean bezala, zaleek zuzenean jarraitu ahal izango dute neurketa, 22:00etatik aurrera, aipatutako lekuetan jarriko dituzten 5x3 metroko pantaila erraldoien bidez.
18:00etatik aurrera, Algortako Geltokia plazan, hiruko futbol kantxa bat jarriko dute, eta herri kirolak, zumba klase bat (19:30-20:30), puzgarriak eta makillaje tailer bat ere izango dituzte.
Aldiz, Santa Eugenia plazan honako ekintzak egingo dituzte egun horretan, 18:00etatik aurrera: mahai tenisa, hiruko futbola, zumba klasea, puzgarria eta makillaje tailerra.
Eguraldi txarra izanez gero, elkarte eta kirol-kluben laguntzagaz antolatutako ekitaldi guztiak eta partidaren emanaldia Gobela eta Fadura kiroldegietara eramango dituzte.
Aldaketak garajeetako sarbideetan
Udalak adierazi duenez, antolatuko dituzten jarduerengatik, eta hiritarren segurtasuna bermatzeko, zapatu horretako 17:30etik domeka goizaldera arte, Telletxe kaleko 1Bko garajerako sarrera eta irteera Zuricalday gozotegi ondotik egingo da, eta Telletxeko 1C eta Dko garajeetakoek eta Juan Bautista Zabala eta Torrene kaleei dagokiena, Algortako etorbidea hartu eta J. B. Zabalatik sartu beharko dira (eta alderantziz irteteko). Era berean, Itzubaltzeta/Romon, Errekaganetik Caja de Ahorros kalerako ibilgailuen sarbidea ere moztuta egongo da 17:30etik aurrera.