Gaur, apirilak 2, langileek euren lan-baldintzak defendatzeko egin duten lehen lanuzteak "jarraipen oso zabala" izan duela azpimarratu dute ELA sindikatutik. Azaldu dutenez, Getxo Lorategiak aldi baterako enpresa-elkarteko beharginek greba mugagabera jo dute, besteak beste, "hitzarmenaren negoziazioa blokeatuta dagoelako".
Halaber, gaineratu dute hainbat bilera egin ostean, enpresak negoziazioan aurrera egiteari uko egin diola eta "KPIaren oso azpitik dauden soldata igoerak eskaini ditu, egungo lan baldintzak okertzeaz gain". Sindikatuak azaldu duenez, beharginek erosahalmenari eustea eta lan-baldintzetan inolako atzerapausorik edo okertzerik ez egotea aldarrikatu dute.
"Getxo Lorategiak ABEEak lorategietako zerbitzua 2022ko apirilaren 1ean lortu zuen, eta lehen egunetik jakinarazi zien langileei zerbitzua defizitarioa dela", adierazi dute, gaineratuz egoera horren errua enpresarena dela, "beheranzko lizitazioa egiteagatik".
Halaber, beharginek Getxoko Udala ere egin dute egoeraren arduradun "zerbitzua horrela esleitzeagatik; izan ere, jakitun ziren era honetan ezin direla plantillaren lan baldintzak bermatu".
Bere aldetik, Getxoko Udaleko prentsa arduradunek adierazi dute Udalak ez duela inolako kontratu-harremanik lorezaintza-zerbitzuko langileakaz, "langileen kontratu-harremana zerbitzuaren lizitazioa duen enpresagaz da".