Bizitzen ari garen krisi kapitalistaren ondorioz, kapitala bere irabaziak bermatu nahian dabil, eta horretarako gizarteko egitura nagusiak berregokitzen ditu; zentzu horretan ulertu behar dira heldu berri diren hezkuntza-erreformak: etorkizuneko langile produktiboak ekoiztera bideratuta daude, merkatuak beharrezkoa duen lan-indarra bermatzeko.
EAEko hezkuntza-lege berriari dagokionez, segregazioan sakontzen du (ikasleriaren langile-klaseko kapa zabal bat hezkuntza-prozesutik kanporatuz) eta modu inposatzailean aplikatu izan da (ikasleriak ez baitu inolako berririk izan neurri hauen inguruan). Halaber, formakuntzaren debaluazioa areagotzen du, eta horren ordez, ikastetxeak diziplinamendu hutserako zentro bilakatzen ari dira.
Azkenik, aipatu behar da erabaki hauek agente pribilegiatu batzuk zuzentzen dituztela, hala nola sindikatuek eta alderdi politikoek. Gainera, enpresa handi eta nazioarteko instituzio burgesen aginduak akordio zabal moduan saltzen dituzte. EAEn, politikoki oso ezberdinak direla suposatzen den lau alderdi parlamentario nagusiak berehala ados jarri dira aldaketa hauek inposatzeko. Aldiz, hezkuntza-komunitatea osatzen duten beste sektore batzuk guztiz baztertuta gelditu dira.
Aurreko guztia kontuan hartuta, greba egiteaz gain, mobilizazioak deitu ditugu Bizkaia, Gipuzkoa, Araba eta Nafarroako hiriburuetan, “Hezkuntza ofentsiba kapitalista gelditu” lemapean. Bilbori dagokionez, 12:00etan abiatuko da manifestazioa Eliptika Plazatik. Zentzu horretan, Uribe Kostako Bigarren Hezkuntzako ikasleak ere grebara etortzera animatzen ditugu.