Amona kritikatzen nuen telenobelak ikusten zituelako, eta gero ni engantxatu nintzen 'Goenkale'-ra. Oso euskalduna, baina euskal telenobela, ukatu arren.
Ikastolan geundela, OHOko 6. edo 7. mailan, maisuak etxerako lan modura jartzen zigun astean behineko kapitulu hori ikustea. Hurrengo egunean, gelan komentatzen genuen. Orain gauza arrunta ematen du, baina nork esango zigun telesail bat euskaraz gelan komentatuko genuenik? Garai hartan, 'Dragoi Bola' zen euskaraz erakargarri egiten zitzaigun bakarra.
"Hori egina zagon!", "Mingaina txulora!" bezalako esaldiak ikasi genituen, eta gure bizitzan Hika agertu zen –ikastolan aditz taulan ezabatzen genuena–. Kaleko euskara edota euskara erakargarri bat ezagutu genuen: biraoak, esamoldeak…
Gaur egun, ETBk ez du euskarazko fikzioaren aldeko apusturik egiten. 'Goenkale', 'Bi eta Bat' eta 'Jaun eta jabe' bezalako telesailek zuten arrakasta, ez dugu berriro ezagutu. Noizko euskarazko fikzio duina?