Joan Lluis Albellaren agurra
Klub leioaztarrak goraipatu egin du Albellak sei urtez egin duen "lan handia" eta harrobiari erakutsi dien arreta. Horri esker, klubak eta taldeko kirolariek "sekulako mailan lehiatzeko" kapazak dira. Horrezaz aparte "aztarna sakona" utzi duela nabarmendu dute Askartzako zuzendaritzako kideek, "klubeko pertsona denakaz konektatu eta pertsona legez asko balio duela erakutsi" duelako. Albellari "etorkizun pertsonal eta profesional oparoa" opa diote, "beti izango baita guretako bat". Datorren denboraldian, Portugalgo Porto hiriko Fluvial Portuense taldean jardungo du, klubak aurkeztu dion proiektua "liluratu egin nauelako", esan du Albellak. Halere, Olotekoak argitu du Askartzan "etxean legez" izan dela eta ez duela baztertzen egunen batean bueltatzea.
Javier Cortes
Askartzak zabaldu duenez, prestakuntza handia ekarriko du tekniko andaluziarrak: Magisteritzan diplomatuta, Heziketa Fisikoan eta Haur Hezkuntzan espezializatu da. Gainera, Dos Hermanasen hartu duen eskarmentua baliagarria egingo zaio. Klubak azaldu duenez, "gaztea da eta ilusioa dauka erronka honengatik". Gaineratu dutenez, "gu denon babesa izango du, datorren denboraldian kluba hazten segitzeko ahalegintzeko". Era berean, sendi guztiei euren babesa eskatu diete, "kirolaz, eta Askartza klubeko kirolarien beharraz eta ahaleginaz gozatzeko, Javier Cortes Nuñez gure arduradun tekniko berriagaz".