Benoit Cornierrek "idatzi zidanean esanez gura izanez gero postua nirea zela ez nuen sinetsi; ez zitzaidan iruditu ni izan nintekeela aukeratua, hainbeste jokalari on izanda. Hortaz, baiezkoa irten zitzaidan bat-batean", azaldu dio Bartolomek Enfermos del Balon Amarillo blogari: "behin hotzean, konturatu nintzen ez zela hain erraza joatea, kontu asko faltan sumatuko dut".
Bartolomek ezaguna du Bordeleko USB taldea, orain dela laupabost urtetik. Birritan jokatu du Leioa Waterpologaz han, klub akitaniarraren lehiaketan; iaz Bordelekoak etorri ziren Sakonetara denboraldiaren aurretiko partida bat jokatzera. Orduan, "sasoitsu nenbilen, oso ondo jokatu nuen eta euren entrenatzailearen arreta piztu nuen; denboraldi osoan jarraitu zidan", kontatu du Bartolomek.
Leioaztarra "gogotsu" dabil abentura berria bizitzeko. Halere, "beldur apur bat" dauka eta frantsesa ez jakiteagatik kezkatuta dago. Ez da bere kezka bakarra: "profesionala izango naiz, ordainduko didate eta beraz, askoz gehiago eskatuko didate". Hasteko, hiru lehiaketei egin beharko die aurre, haietako bat Europa mailakoa. "Seguru aski une zailak izango dira, baina gainditu ahal izango ditut", ziur dago Sakonetako izarra.