Iban Rodriguez Etxebarria Leioako alkateak Gailurretan izan gaitun, mendizale, alpinista eta eskalatzaile aitzindariak, 1924-2024 erakusketa inauguratu zuen atzo, Kultur Leioan, martxoaren 9ra arte. Erakusketa Euskal eta Nafarroako Mendizale Federazioak antolatu du, bere mendeurrena ospatzeko, eta Iruñan lehen geldialdia egin ondoren iritsi da Leioara. Horren helburua da azken 100 urteetan emakumeek mendiko kirol-modalitateetan izan duten parte-hartzea ikusaraztea eta aitortzea.
Inaugurazio ekitaldian, Iban Rodriguez Etxebarria alkatea eta Estibaliz Bilbao Kultura zinegotziagaz batera izan ziren Euskal Mendizale Federazioko presidente izandako eta Euskal Mendizale Federazioaren Mendeurrenaren Batzordeko kide den Antonio Ortega, Euskal Mendizale Federazioko lehendakariorde eta Euskal Mendizale Federazioaren Mendeurrenaren Batzordeko kide den Ricardo Hernan, Euskal Mendizale Federazioko kide Mireia Trigueros, Leioa Mendi Taldeko presidente den Santiago de Diego eta klub horretako kide diren emakume ordezkariak.
Erakusketatik ibilaldi bat egin ondoren, Leioako alkateak azpimarratu zuenez, "erakusketa hau mendiaren munduan aitzindari izan ziren emakumeei egindako omenaldia da, gailurretara iritsi ziren baina, batez ere, estereotipoak eta kristalezko sabaiak hautsi zituzten emakumeei, eta baita emandako pausu horiek jarraitu egin direnei, haiek direlako duela mende bat oztopoak eta zailtasunak gainditzeko egindako ahalegin eta konpromiso horrek merezi izatea eragin zutenak".
GGaineratu zutenez, Gailurretan izan gaitun, mendizale, alpinista eta eskalatzaile aitzindariak, 1924-2024 erakusketak kultura, kirola eta feminismoa bateratzen ditu. Hori dela eta, Leioako Udalak erakusketaren datak aukeratu ditu, M8aren, Emakumeen Nazioarteko Egunaren, Mendi Astea eta Mendi Tour ekitaldiakaz bat egiteko.
Horregaz batera, aste honetan mendiagaz lotutako hitzaldi, topaketa, proiekzio, film labur eta dokumentalez betetako programazioa dute, Leioako Udalak antolatua, Leioa Mendi Taldearen eta Mendi Film Festivalen laguntzagaz.
