Azaroaren 10ean martxan jarriko duten proiektua Residuo Cero fundazioaren lankidetzari eta Plentziako Udalaren diru-laguntzari esker abiaraziko dute. Rexcatering Espainiako Estatu mailan jantoki eta sukalde handietan sortutako elikagai-soberakinak osasun-berme guztiak berreskuratzen dituen proiektu bakarra dela azpimarratu dute Residuo Cero fundazioko kideek, "betiere Europako Batasunak proposatutako Garapen Jasangarrirako Helburuei jarraituz".
Halaber, proiektua daborduko inguruko hainbat udalerritan ezarri dute, hala nola Azpeitian, Etxebarrin, Durangon, Lemoan eta Donostian. Horrez gain, Innobasquek, Berrikuntzaren Euskal Agentziak, Global Innovation Day 2021ean berrikuntzako sei jardunbide eredugarrienen artean aipatu zuen Rexcatering proiektua, eta 2023ko maiatzaren 11n Varsovian (Polonian) egindako Innovation in Politics Awards 2023 sariketan Europako saria jaso zuen Klimaren Babesa kategorian.