Helburu horregaz, operadoreko teknikoak egun hauetan auzokide eta komunitateak bisitatzen hasi dira zuntz optikoa instalatzearen abantailen berri emateko: "doakoa dela eta ez duela inolako konpromisorik suposatzen zerbitzuen kontratazioari begira", esaten omen diete.
Udal-iturrien arabera, "4G sarea eta zuntz optikoa (FTTH) etxeetara eramanez, udalerria konektibitate teknologia onenekin hornitzea besterik ez da alde bien helburua". Hala, zuntz optikoko azpiegituran egingo den inbertsio hau, Orangek 4G mugikorren zerbitzuen promoziorako Sopelan egiten dabilen kanpainari gehitzen zaio; daborduko 200.000 euro inguru bideratu ditu operadoreak, horretara.
"Horri esker, udal bizkaitarreko auzokideen %94 inguruk datu mugikorrak transferitzeko gehienezko abiadura izango dute", nabarmendu du Udalak. Hirigintzako zinegotzia den Felix Gabarainek maila honetako proiektuek udalerriko "biztanleentzako dakartzaten onurak" azpimarratu ditu, eta bertoko enpresarien garapen ekonomikorako ere. "Merkatuko teknologia finko eta mugikor aurreratuenak dituzten komunikazio sareen abantaila guztiak izango dituzte", aipatu duenez.
Bere aldetik, Orange operadoreko ordezkariek jasotako laguntza eta erraztasunak eskertu dizkiote Udalari, "baita auzokideei eragozpen gutxien sortzeko hedatze lanak gauzatzeko udaleko teknikoekin mantentzen ari diren koordinazio ona ere". Halaber, bere udalerrira ahalik eta azkarren 4G teknologia eta zuntz optikoa iristeak ekarriko dituen onura eta erraztasunen berri auzokideei ematerakoan "Udalaren parte-hartzearekiko gogobetetasuna" adierazi dute.