Jendartea  Sopela 2017-03-15 17:26

Sopelako Udaltzaingoa lagun bi ikertzen dabil, trafiko-delituak egotzita

Sopelako Udaltzaingoak 19 eta 37 urteko Bilboko lagun bi atxilotu zituen joan den aste-akabuan, trafiko-segurtasunaren aurkako ustezko delituengatik. Bati, ausarkeriaz eta gida-baimen barik gidatzea leporatu diote; eta besteari, puntu barik gidatzea.

Sopelako Udaltzaingoa lagun bi ikertzen dabil, trafiko-delituak egotzita
© SOPELAKO UDALA | Ikusi handiago | Argazki originala

Aurreko zapatuan (martxoak 11), 13:30ak aldera, Sopelako Udaltzaingoak modu desegokian zebilen auto bat geldiarazi zuen, Urkobide kalean. Gidariak, 19 urteko gazte bilbotar batek, ez zien kasurik egin agenteen aginduei, eta ziztu bizian abiatu zen Getxora bidean. Kotxeak Uribe Kostako pasabidea, Avanzada eta A-8 errepidea zeharkatu zituen, Barakaldoraino heldu zen arte. Bertan, pasabide nagusitik atera eta Gurutzetako ospitalearen ondoko irteera gabeko kale batean amaitu zuen ihesaldia. Udaltzainek bidaiariak identifikatu zituzten, kotxea geldiarazi ostean. Identifikazioan konprobatu zutenaren arabera, gidariak ez du sekula gida-baimenik izan; hortaz, bide segurtasunaren kontrako delituengatik polizia-atestatua zabaldu zuten. Autoa udal-biltegira eroan zuten eta epaitegiaren esku geratu zen. Lau bidaiarien azaleko-erregistroan kalitate ezberdineko substantzia estupefazienteak aurkitu zituzten. Gauzak horrela, udaltzainek salaketa-aktak egin zituzten, Herritarren Segurtasunerako Legearen urraketa egotzita.

Halaber, Udaltzaingoak jakinarazi duenez, martxoaren 10ean, 37 urteko Bilboko lagun bat epaiketa azkar bat egiteko deitua izan zen, ikertu gisa. Gizonezkoa, puntu barik eta horiek berreskuratzeko ikastarorik egin barik harrapatu zuten. Gertaera 14:45ak aldera jazo zen Akilino Arriola kalean. Udaltzainek gidaria geldiarazi zuten eta dokumentazioa konprobatzerakoan, punturik ez zuela baieztatu zuten. Hortaz, ikerketa zabaldu zioten, Bide Segurtasunaren kontrako delitua leporatuta; izan ere, antza denez, daborduko gidaria delitu beragatik ikertu zuten 2013an eta 2015ean.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa