Kirolak  Sopela 2017-03-23 16:53

Sopelan, herri-lasterketa prest

Hamabosgarrenez, Sopelako Herri Lasterketa antolatuko du Munarri atletismo-taldeak. Hitzordua domekan ipini dute, hilaren 26an; baina, izen-ematea gaur, eguena, itxiko dute, 20:00etan. Inskripzioa antolatzaileen webgunean bete daiteke.

Sopelan, herri-lasterketa prest
© MUNARRI ATLETISMO-TALDEA | Ikusi handiago | Argazki originala

Modu berean, honako lekuetaraino ere jo ahal izango da: Kurtzio kultur etxea (18:00etatik 20:00etara), Algortako Torrene kaleko Kantxa Kirol Moda eta Bilboko Euskalduna kaleko Deportes Bikila denda.

Ohi den legez, elkartasun-ekimena izango da atletismo-proba; hala, batuko duten diru dena aprendeTEA elkarteari emango diote, Autismo Espektroaren Nahasteak eta Asperger dituzten Familien Prestakuntza eta Aisiaren Sustapenerako Elkarteari, alegia. Hori dela eta, euro biko inskripzio-kuota ezarri dute senior eta beterano mailakoentzat; euro banako kuota, gainerakoentzat. Dortsala udaletxean jasotzeko unean ordainduko da.

Proba goizeko 10:30ean hasiko da, Sopelako udaletxearen aurreko plazan. Lehenengo, 400 metroko lasterketari ekingo diote parte-hartzaile txikienek, 2013an eta handik aurrera jaiotako neska-mutilek. Gero, hamar minutuan behin irtengo dira hurrengo mailakoak; hurrenez hurren 800, 1.200, 1.500, 3.000 eta 7.700 metro egiteko. Ehunka parte-hartzaile espero dituzte.

Antolakuntzak ohartarazi du ordu-aldaketagaz kontuz ibiltzeko.

2017/03/25 10:30

Sopelako udaletxea | Sopela

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa