Iazko txapelketan finalaurrekoetara heldu zen Arakistain, Frida Watkins zumaiarragaz batera. Aldiz, astelehenean, hilak 26, hasiko den txapelketan Arakistain Elaia Gogenola berriatuarra izango du taldekide. Beraien lehen partidua martxoaren 4an izango da, 19:00etan, Erika eta Maialenen aurka.
Egungo txapeldunak, Erika Mugartegi eta Araia Lejardi ez dute bikote moduan jokatuko aurtengo txapelketan. Batetik, Mugartegik Maialen Aldazabalegaz (Berriatua) jokatuko du, eta, bestetik, Lejardik Helena Barrenetxea durangarra izango du taldekide. Txapelketako laugarren bikotea Maite Ortiz de Mendibilek (Gasteiz) eta Frida Watkingsek (Zumaia) osatuko dute.
Horrez gain, gizonezkoen Banakako Series txapelketa ere jokatuko dute Johan Sorozabalek, Ludovic Laduchek, Aritz Erkiagak Unai Lekerikak. Lehendabiziko biak otsailaren 26an izango dira aurrez aurre, eta astebete geroago, puntista bizkaitarren txanda helduko da. Azken bi horiek jokatu berri den Eusko Label Winter Series txapelketako finala jokatu dute elkarren aurka.