Urdulizko Santa Mariñe egoitzako beharginek lan baldintza duinak eskatzeko 15 minutuko lanuzteak egiten daramatzate bi hilabete baino gehiago, baita zaintza etekin ekonomikoen gainetik jarriko duen eredua aldarrikatzen ere. Denbora tarte horretan, baina, GSR enpresak esku hartu ez duela ikusita, bihar eta etzi, martitzenean eta eguaztenean, hiruna orduko lanuzteak egingo dituzte. Hilaren 27an, goizez, 11:20etatik 14:20etara; eta hilaren 28an, arrastiz, 18:30etik 21:30era.
GSR Santamariñeko langileak nazkatuta gaude‼️
— LAB Soziokomunitarioa Bizkaia (@LABsozbiz) June 26, 2023
‼️Las trabajadoras de la residencia GSR Santamariñe estamos hartas‼️
📆Ekainak 27: 11:20-12:20 Manifestazioa Urdulizen. Ondoren 14:20ak arte kontzentrazioa
📆Ekainak 28: 18:30-19:30 solasaldia.
19:30-21:30 Kontzentrazioa pic.twitter.com/1z7cSfnNAe
LAB sindikatutik azaldu dutenez, alde batetik, gerokultoreak edo geriatria-laguntzaileak paziente diabetikoei intsulina emateko ardura ezarri gura du enpresak, "eta horrek, langile horien funtzioetatik erabat kanpo egoteaz gain, egoiliarren osasuna arriskuan jartzen du, ez gerokultoreek ez erizaintzako laguntzaileek ez baitute horretarako prestakuntzarik". Bestalde, langileenganako eta egoiliarrenganako "tratu txartzat jo daitezkeen egoerak" egunero gertatzen direla salatu dute sindikatuak eta langileek, "izan ere, oraindik ere, gutxi gorabehera zazpi minutu ditugu egoiliar bakoitza oheratzeko".
Horrez gainera, grebarako eskubidea aldarrikatu dute beharginek. Izan ere, sindikatuak azaldu duenaren arabera, eskubide hori behin baino gehiagotan urratu izan zaie mehatxuen, derrigortzeen eta askotariko oztopoen bidez. "Hori gutxi balitz, GSRk grebetan parte hartu duten grebalari batzuei kontratua ez die luzatu edo alde batera uztea erabaki du, eta ohartarazpen eta salaketa espediente ez oso gardenak ezta sinesgarriak ireki dizkie lanuzteekin bat egiten zuten langile batzuei. Bitartean, horiei egozten zaizkienak baino hutsegite larriagoak jasan behar izaten dituzte langileek".
Halaber, enpresako zuzendaritzak hainbat langileri jakinarazi ei die taldea berritzeko asmoa, "GSRk langile otzanak nahi baititu". Bada, une hori iritsi arte, egoiliarren eta langileen eskubideen alde borrokatuko dutela iragarri du LABek, eta, hala, besteak beste, egunotarako mobilizazioak iragarri dituzte: "Onartezina da gizartearen alde zaurgarrienak egunero horrelako tratua jasatea, publikoa izan beharko lukeen zaintza sistemak etekin ekonomikoak egoiliarren zein langileen aurretik jartzen dituelako".
Horren guztiaren aurrean, LABek "zaintza eredu duin baten alde" borrokatzen jarraituko duela iragarri du, bai egoiliarrentzat, baita langileentzat ere. "Eredu horretan langileen eta egoiliarren duintasuna arlo ekonomikoaren gainetik kokatuko da, nahiz eta GSRrekin oso urrun gauden helburu horietatik, Pertsonarengan Oinarritutako Arretarekin ahoa betetzen zaien arren. Edonola ere, benetan betetzen dutena haien poltsikoak dira, eta ez, hain zuzen, aldarrikatzen dituzten baloreekin", deitoratu dute sindikatuko kideek.