Neguari bertsotan egingo diogu ondoetorria Uribe Kostan. Batetik, bertso-jirek beteko dituzte kaleak, hemendik eta abenduaren 30era bitartean.
Sopelan, bihar kantatuko dute Maddalen Arzallusek eta Aitor Sarriegik, Gibelurdinak taldeak lagunduta, 20:00etatik aurrera; udal-pilotalekutik abiatuko dira. Biharamunean, Urdulizen abestuko dute Sustrai Colinak eta Uxue Alberdik, Unai eta Koldo Etxebarria lagun; 13:00etan hasiko dira Txiberri tabernan. Abenduaren 16an, Plentziara hurreratuko dira Amets Arzallus eta Aitor Mendiluze, eta Oxabi taldea izango dute alboan; Elizako plazatik irtengo dira 19:30ean. Abenduaren 30ean izango da azkenengo saioa, Erandion: Julio Soto eta Alaia Martin jardungo dira, Erandioko trikitilariakaz batera; hitzordua ipini dute Altzagako La Plaza tabernan, 20:30ean.
Bestetik, ALBE Gala egingo du Algortako Bertsolari Eskolak abenduaren 10ean, Neguriko Jolastoki jatetxean: Fredi Paia, Oihana Iguaran, Amets Arzallus eta Iratxe Ibarrak abestuko dute, Andoni Egañak gidatuta; 18:00etatik aurrera.
Amaitzeko, akorduan eduki, Jone Uria Albizuri algortarra Bizkaiko txapela Uribe Kostara ekartzen ahaleginduko dela, abenduaren 17an, Bilbon.
Ekitaldiak:
- Abenduak 2, Sopela
20:00 Maddalen Arzallus eta Aitor Sarriegi, eta Gibelurdinak. Udal-pilotalekutik. - Abenduak 3, Urduliz
13:00 Sustrai Colina eta Uxue Alberdi. - Abenduak 10, Getxo
18:00 ALBE Gala. Jolastoki jatetxea. - Abenduak 16, Plentzia
19:30 Amets Arzallus eta Aitor Mendiluze, eta Oxabi. Elizako plazatik. - Abenduak 30, Erandio
20:30 Julio Soto eta Alaia Martin. Altzagako La Plaza tabernatik.