Hezkuntza  Berango  Erandio  Uribe Kosta 2017-03-22 16:59

Euskaraz ikasten jarraitzeko, Nahi Dudalako! ekimena

DBH euskaraz egin duten gazteek etorkizuneko ikasketak ere euskaraz egin ditzaten animatzeko Nahi Dudalako! ekimena ipini dute martxan aurten ere. Bizkaiko hainbat udalerrik parte hartzen dute proiektu horretan, tartean Uribe Kostako Berangok eta Erandiok.

Ekimena 15 eta 16 urte arteko gazteei eta euren gurasoei zuzenduta dago. Horren helburua da DBH 4. mailan dabiltzan gazteek etorkizuneko ikasketetan ere euskarazko eredua aukeratzea. Horretarako, behar duten informazio guztia emango diete; hori dena kanpainaren webgunean dago ikusgai.

Horretan, gazteek Batxilergoa zein Lanbide Heziketa euskaraz egiteko eskaintzaren nondik norakoak jasoko dituzte. Gainera, unibertsitateko eskaintza zein den ikusteko aukera ere ematen du webgune horrek. Hala, gazteek etorkizunera begira izan ditzaketen zalantzak argitzeko baliagarria izango zaie.

Webguneagaz batera, kanpainaren berri emateko diptikoa banatu zaie kanpaina bultzatu duten udalerrietako gazteei. Guztira 6.200 eskuorri banatu dira. Aurten, Lanbide Heziketak duen garrantzia nabarmendu gura izan dute, eta Lanbide Heziketa euskaraz egiten dabiltzan hainbat neska-mutilen testigantzak jasoko dituzte.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa