Valadares de Gaia talde portugaldarra izango da gonbidatuetako bat aurtengo futbol-txapelketarako. Beragaz batera parte hartuko dute Athleticek, Bartzelonak, Atlético de Madridek, Erandioko Betiko Neskak hamaikakoak eta etxeko taldeak: Bizkerrek. Hortaz, "goi mailako txapelketa" izango da Bizkerrek antolatutakoa, klubak iradoki duenez.
Zapatuan, ekainaren 17, txapelketaren lehenengo fasea jokatuko da 10:30etik aurrera Bolue 1 eta 2 zelaietan. Goizean, zuzeneko norgehiagokak jokatuko dira eta horietan erabakiko dira finalistak. Finalak domekan, hilaren 18an, Fadurako zelaian jokatuko dira. Hala, 5. eta 6. postuak erabakiko dituen partida 09:30ean hasiko da; 3. eta 4. postuak erabakiko dituena, 10:40an; eta final handia, 12:15ean.
Aurreko edizioetan egin izan den moduan, partida guztietarako sarrera libre eta doan izango da.
Bizkerrek badauka zenbait laguntzaile, hala nola: Getxo Kirolak, Bizkaiko Foru Aldundia eta beste erakunde pribatu batzuk.