EAJ, PSE-EE eta PPren aldeko botoakaz, EH Bilduren abstentzioagaz eta Elkarrekin Podemosen kontrako botoagaz, Berangoko Udalak baditu 2024rako aurrekontuak, 9.444.946 eurokoak, guztira. Ildo horretan, Itziar Aguinagalde alkatea pozik agertu da lortutako emaitzagaz, "aurrekontu anbiziotsua eta errealista delako".
Inbertsioen kapituluari dagokionez, udal-gobernuak 2,7 milioi bideratuko ditu "herritarrek aurrekontu parte-hartzaileen prozesuan eskatu dituzten" zortzi jarduera gauzatzeko. Inbertsio nagusia Lantzarte auzoa berrurbanizatzeko proiektuarena izango da, bi milioi euro erreserbatu baitira horretarako. Horri dagokionez, udal-planak kaleen zoladura ordezkatzea, kaleen irisgarritasuna hobetzea eta oinezkoen eta ibilgailuen arteko bizikidetza bultzatzea aurreikusten du, baita aparkalekuak eta auzorako sarbideak berrantolatzea ere.
"Aurrekontua onartzea da herritarrekin ditugun konpromisoak lantzen eta garatzen jarraitzeko aukera ematen digun tresna. Gauzatuko ditugun inbertsio gehienak berangoztarrek adierazitako beharrei erantzuteko izango dira", azpimarratu du alkateak. Izan ere, udal-arduradunak azaldu duenez, inbertsio horiek udalerrian martxan jarritako aurrekontu parte-hartzaileetan herritarrek adierazitako beharrizanei erantzun gura diete.
Inbertsioak
| Zertara | Zenbatekoa |
| Bizipark instalazioak | 65.000 euro |
| Itze ibaiaren ondoko paseoa | 110.000 euro |
| Bidegorria udalerrian | 215.985 euro |
| Lantzarte auzoa berrurbanizatzea | 2.000.000 euro |
| Bizkerre etxearen (Lipperheide etxea) estalkia konpondu | 333.000 euro |
| Zirkulazioa arintzeko ikerketa | 17.000 euro |
| Getxo-Berango bizikleta-proiektua (S. Otxandategi) | 35.000 euro |
| Moreagako ambigurako ekipamendua | 10.000 euro |