Orain arte EH Bildu eta PSE-EE alderdiek bosna zinegotzi izan dituzte Erandioko Udalbatzan, baina maiatzaren 28ko hauteskundeen ostean, koalizio abertzaleak seigarren zinegotzia eskuratu zuen, eta sozialistak laugaz geratu ziren. Zapatuan, Udalbatzak osatzen dituztenean, Erandion EH Bilduk Imanol Eguskiza aurkeztuko du aginte-makila jasotzeko, baina hori gauzatzeko PSE-EE eta Elkarrekin Podemosen babesa beharko luke.
Momentuz, PSE-EE EAJren alkategaiak sostengatuko dituela aurreratu du, zuzenean botoa emanez edo abstentzioaren bitartez. Horrenbestez, ekimenak ibilbide laburra izatea aurreikusten dute, "gure saiakerak gorabehera, uste dugu Aitziber Oliban izango dela alkatea datozen lau urteetan, PSE-EEren babesari edo abstentzioari esker".
Dena den, koalizio abertzaleak "lehen indar aurrerakoia" izatea lortu duela azpimarratu dute, eta EAJ Alkatetzatik kentzeko ezkerreko alderdiei elkarren arteko "gobernu aurrerakoi berri bat eraikitzeko" proposamena luzatu diela jakinarazi du ohar bidez. "Erandion politika egiteko moduak aldatu egin behar dira. Baina ezin da izan gure herriaren etorkizuna Erandiotik kanpoko bulego batean eta Erandiokoak ez diren pertsonek erabakitzea", aldarrikatu dute Erandioko EH Bildukoek.