Manos Tijeras ile-apandegiaren izenaren istorioa bitxia da: "Lan egiten nuen aurreko ile-apaindegian beti nengoen ilea mozten, nire buruzagiak hori egiten soilik uzten zidalako. Beti artaziak eskuan ibiltzen nintzenez bezero batek esan zidan "manos tijeras" nirudiela. Gainera, Tim Burton maite dut. Horregatik, nire negozioari hala deitzea erabaki nuen", azaldu digu Soniak.
Hala, egun dituen bezeroei dagokionez, apur bat denetarik duela baieztatu du: "Jende nagusia asteburuetan dator. Astean zehar gazteagoak diren lagunak etortzen dira". Hala ere, gaur egun bezero fidelik ez duela nabarmendu du. "Bezero fidela dela uste duzuna, bat-batean egun batean etortzeari uzten dio. Beharbada urte batzuk eta gero bueltatu egingo da. Baina, orokorrean, aldatzen doaz".
Era berean, bere ile-apandegiaren bereizgarria "hurbiltasuna" dela nabarmendu du. "Jende asko horregatik datorrela uste dut, hurbila naizelako eta beren gauzak kontatzen dizkidatelako. Beste ile-apaindegi batzuetan hotzagoak dira, eta ondo dago profesionaltasuna ematen diolako negozioari, baina ez dugu ahaztu behar pertsonakaz lan egiten dugula".
Manos Tijeras ile-apaindegia sortu zuenean beldurrik eduki ez zuela aitortu du Peñak, bera beti "apur bat zoroa" izan baita. Hala ere, gaztea zenean ilusio handiagoa zuen eta ile-apaindegia bere amets gisa irudikatzen zuen. Denboragaz errealistagoa bihurtu dela dio, batez ere, bizitako garaiak eta gero. Igarotako krisi ekonomikoak eta pandemiak eragin gogorra izan du ile-apaindegian eta egungo egoera onena ez dela aitortu du. Beraz, oraintxe bertan negozioa "bizirauten" dagoela deitoratu du.