Irati arropa-dendak 25 urteko ibilbidea dauka, eta oraindik bere hasierako ideiari eusten diotela azaldu du Eider Azpiri ugazabak: "Gure bezeroak eta gu gustura egoteko leku bat sortu nahi genuen, modaren industriak ezarritako kolore eta formetatik kanpo egongo zena, saltoki estandarretan aurkitzen ez diren produktuak eskainiko zituena, hain zuzen".
Horretarako, kontatu du artisauakaz eta moda jasangarria egiten duten askotariko ekoizleakaz egiten dutela lan. "Gure produktuen jatorria sortzaileen sormena eta maitasuna da, beraiengandik ateratzen diren diseinuak ditugu, eta hori da agian gehien bereizten gaituena", adierazi du dendariak. Hori dela eta, beraien dendan bakarrik aurkitu daitezkeen produktuak eskaintzen dituzte: jantziak, eraztunak, belarritakoak, motxilak eta poltsak, besteak beste.
"Gurera datozen bezeroak kolorearen bila eta zerbait desberdina nahi dutelako datoz, badakite moda estandar horretatik kanpo dagoen zerbait bilatzen ari direnean gurera etorri daitezkeela", azaldu du Azpirik. Horrez gain, bera eta bere lankide biak euskaldunak izatea eta arreta euskaraz ematea bezeroek baloratzen duten gehigarria ere dela azpimarratu du. Horrek guztiak dendan, bezeroen eta saltzaileen artean oso giro ona eta atsegina sortzen duela dio, bai erosleakaz baita lantadean ere.
Dioenez, etorkizunera begira, dendan bertako ekoizleen produktu gehiago izatea gustatuko litzaioke. "Jasangarritasuna, errespetua eta gure filosofia jarraitzen duten inguruko sortzaileen produktu gehiago eskaini ahal izatea gustatuko litzaidake, baita hasiberriak direnenak ere", azaldu du.