Gorlizko EH Bilduk bere babes eta elkartasun osoa adierazi dio publikoki bere kide batek jazarritako udaltzainari. Biktimak lan-baja eskatu zuen eraso horiek eratorrita, eta Bilboko Lan Arloko epaitegiak arrazoia eman dio emakumeari, antsietateagatik hartu zuelakoan. Ildo horretan, koalizio abertzaleak arbuiatu egin du Giza Baliabideen Arloko arduradun politikoen jarduteko modua, "erakutsi duten pasibotasunagatik eta okultismoagatik. Ikusita zein gardentasun ezarekin jardun duten, batzordeetan, osoko bilkuretan edo Gobernu Batzordean une oro gainerako zinegotziei egoera hori ematen ari zela ezkutatuz".
Hori dela eta, EH Bilduk osoko bilkura deitzea eskatuko duela iragarri du, egoera horren aurrean udal-gobernuak dagozkion azalpenak eman eta jazarritako langilea babesteko hartutako neurriak azal ditzan. "Horren ondoren, beharrezko erabakiak hartuko ditugu", azpimarratu du koalizio abertzaleak.
Mobilizazioa
Udaltzainen arteko jazarpen-kasu horren aurrean, Sorginen Alabak talde feministak erasoa salatzeko elkarretaratzea deitu du barikurako, martxoaren 3rako, Gorlizko udaletxe plazan, 19:00etan.
