Espainiako Guda Zibilaren galtzaileak diktadura militar baten mendean utzi zituzten mundu gerrako garaileek, eta Frankok, buruhauste handirik gabe, demokraziaren mundu berri horretan lekua aurkitu zuen. Historiaren kiribilak etengabe jartzen ditu aurrez aurre haren protagonistak, eta hamarkadak pasa arren, askok oroimena badute. Duela haste batzuk, Frankoren estatua erraldoi bat kendu zuen Espainiako Gobernuak Madrilen. Jende andana kaleratu zen kaudilloa azken aldiz goresteko eta kazetariek itaundutako gazte -30 bat urte- batek zera esan zuen: "Frankok gauza on asko egin zituen Espainiaren mesederako eta espainiarrek ezin dute ahaztu egungo erregea Frankori esker dagoela dagoen lekuan".
Eskuindar baten hitzak izan arren, egia borobila madrildar horrena. Aste honetako albiste nagusiena bilakatu duten Asturiasko Printzeen haurdunaldiak historiarekin duen hitzordua laga ezin duela, azpimarratu beharreko kontua da jaiotzera doan haurra Frankori esker izango dela ere estatu burua, zuzenbideko estatu demokratiko baten burua, herritarrek nahitaez onartu beharko duten arren.