Herri indigenei buruzko filmak proiektatuko dituzte gaurtik aurrera Kultur Leioan

"Herri Indigenetatik komunikazioa eraikitzen" lelopean, ostegunera bitartean, film luzeak, film laburrak eta dokumentalak eskainiko dituzte Kultur Leioako entzungelan, Mugarik Gabe gobernuz kanpoko erakundeak antolatutako IV. Garapen eta Komunikazio Emanaldien barnean (ikusi foiletoa pdf-n). Horrenbestez, gaur “Eso viene sucediendo” (Mexiko, 12 minutu), “Inhaladores” (Australia, 15 minutu, azpititulatua) eta “Mi primer contacto” (Brasil, 56 minutu, azpititulatua) egongo dira ikusgai. Asteazkenean, berriz, “El portal de los gitanos” (India, 54 minutu, azpititulatua) eta “Del azul al cielo” (Guatemala) proiektatuko dituzte. Eta azkenik, ostegunean, Boliviari buruzko saioa egingo dute: batetik, "Contra viento y marea” (17 minutu) film laburra emango dute; eta bestetik Jesus Gonzalez Pazos Mugarik Gabeko Herri Indigenen Saileko arduraduna eta “Bolivia, la construccion de un pais indigena” liburuaren idazleak eskainiko du hitzaldia. Saio guztiak 20:00etatik aurrera izango dira, sarrera doan. Argazkian, jardunaldien kartelerako erabili duten irudia.