Taberna bateko zerbitzaria atxilotu dute Areetan haxixa saltzea egotzita

Getxoko Udaltzaingoak M.A. inizialak dituen Portugaleteko 28 urteko auzokidea atxilotu du, zerbitzari gisa lan egiten zuen Areetako tabernan drogekin trafikatzea leporatuta. Tokiko polizia establezimendu berberaren kontra doan bigarren aldia da, udal iturriek adierazi dutenez, eta itxi eta zigilatu egin dute epailearen erabakia ezagutu arte. Atxilotua egoera irregularrean dago eta ez du polizia-aurrekaririk, gaineratu dutenez. Taberna horretako zerbitzaria substantzia estupefazienteak (haxixa) saltzen ari zenaren susmoa izanda eta ostatua zelatatzeko operazioa martxan jarri ondoren, taberna barruan une batez izan eta alde egin zuten bezero batzuk ikusi omen zituzten ostiralean udaltzainek. Bisita horietako batean, gazte bat tabernan sartu zen eta edari bat hartu eta zerbitzariarekin zerbait trukatu ostean joan zen. Agenteek inguruan geldiarazi zuten eta 20 euroren truke haxix zati bat erosi zuela egiaztatu zuten, tokiko poliziak zabaldu duenez. Substantzia atzemanda, udaltzainak tabernan sartu ziren eta zerbitzariari jakinarazi zioten ikuskapen bat egingo zutela, haxixaren trafiko delitua egiten ari zenaren susmoagatik. Zerbitzariari bi zati haxix aurkitu zizkioten eta 25 bat gramoko pakete bat kafearen makinaren barruan. Era berean 462,70 euro ere atzeman zituzten. Agenteek zerbitzaria atxilotu zuten eta taberna itxi eta zigilarazi zuten epailearen erabakiaren zain.