Atxiloketak, kargak eta identifikazioak burutu dituzte poliziek grebaren aurka

Hego Euskal Herrian ELA, LAB, EILAS, EHNE eta Hiruk osatzen duten gehiengo sindikalak deitutako eta ESK, CNT eta CGT sindikatuek babestutako greba orokorrari goizean goizetik egin diote aurre kolore ezberdinetako poliziek. Izan ere, Guardia Zibila eta Ertzaintza inoiz baino gehiago ikusi ahal izan dira kaleetan eta ez geldi egoten, gainera. Espainiako Armadak ere tankeak kaleratu ditu gaur goizean Andoainen, Pello Urzelai kazetariak zabaldu duenez. Horretaz gain, gutxienez lau pertsona atxilotu dituzte goizean Gasteizen, Sestaon, Trapagaran eta Leioan lagun bana atxikitu duela Ertzaintzak. Leioako Artea merkataritza gunean atxilotutako gaztea, baina, unean bertan askatu egin dute. Guardia Zibilak bere aldetik, hiru langile atxilotu ditu Iruñeko Landaben Volkswagen fabrikara doan errepidean, pentsioen erreformaren aurka bertan kateatu direlako. Oldartu ere bortizki oldartu zaizkie poliziak piketei, tartean, berriro ere, Leioako Artea merkataritza gunean. Bizkaian ere, Bilboko El Corte Ingles merkataritza gunean gogorrak izan dira emandako makilkadak. Sestaon jada atxilotutako gizon bat jipoitu dute. Argazkian, Espainiako Armadaren tankeak Andoainen / © Pello Urzelai.