Itzubaltzetara helduko da bihar Euskal Herriko Mus Txapelketa

Euskal Herriko Mus Txapelketaren hirugarren edizioa azaroaren 27an abiatu zen Leitzan eta Miranda de Ebron. Abenduaren 19an, igandearekin, heldu zen Uribe Kostara; Sopelara, alegia. Hordagozaleen hitzordua Sekeko gaztetxean jarri zuten. Giro bikainean jokatutako kanporaketan, Antxon eta Enry bikoteak irabazi zuen. Hartara, eurak dira Bizkaia mailako kanporaketarako sailkatuta dauden lehenengo uribekostarrak. Otsailaren 27an Ondarroan izango da hori eta, orduan jakingo dute, martxoaren 12an Urruñan jokatuko den Euskal Herri mailako finalean izango diren. Hala ere, egongo dira eskualdeko bikote batek txapela janzteko aukera gehiago. Bihar, larunbata, Itzubaltzeta / Romoko Branka herriko tabernan egingo dituzte sailkapen partidak, 16:30etik aurrera. Hala ere, ez du ematen izen-ematea tokikoentzat bakarrik mugatuta egongo denik. Bikote bakoitzak 20 euro jarri beharko ditu egunean bertan. Uribe Kostako beste udalerrien kanporaketei dagokionez, Berangon aurten ez dute egingo, bertokoek adierazi dutenez. Gainontzeko herriei dagokienez, hilaren 31 da herrietako kanporaketak egin ahal izateko azken eguna, antolaketa-arauen (pdf) arabera. Argazkian, seguru asko, tabako paketerik mahai gainean ikusteko aukerarik ez da egongo aurten.