Euskal Herriko Unibertsitateko (EHU) Gobernu Kontseiluak Inbertsiorako eta Azpiegituretarako Urte Anitzeko Plana (2011-2015) onartu zuen joan den osteguneko batzarrean. Datozen bost urteetan 146 milioi euro inbertituko ditu azpiegituretan EHUk. Proiekturik handiena Medikuntza eta Odontologia Fakultatea eta Erizaintza Unibertsitate Eskola hartuko dituen eraikina izango da. Bilbon egongo da, Basurtun hain zuzen, eta 76 milioi pasatxoko aurrekontua izango du. Horrekin batera, beste hainbat egitasmo ere onartu ditu EHUk: Filosofia eta Hezkuntza Zientzien Fakultatearen eta Psikologia Fakultatearen aurrealdeak eta klimatizazioa berritzea Donostian (6 milioi euro), Leioa eta Erandioko campuseko ekialdeko aparkalekua eraikitzea (9,5 milioi euro), Gipuzkoako Prestakuntza eta Berrikuntzako Balio Anitzeko Zentroa sortzea (7,7 milioi euro) eta Giza eta Gizarte Zientzien Ikerketa eta Ikasketa Aurreratuen Zentroa eraikitzea Araban, besteak beste. Argazkian, Irakasleen Unibertsitate Eskola hartuko zuen egoitza berriaren "lehen harria" jarri zuten 2010eko otsailaren 25ean Leioa eta Erandioko campusean.
Ikusi Inbertsiorako eta Azpiegituretarako Urte Anitzeko Planaren (2011-2015) aurkezpena:
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun