"Leioaztarren onerako bada", alderdi politiko denakaz lan egiteko prest agertu da Mari Carmen Urbieta jelkidea.
Xabier Olabarrieta PPko bozeramaileak erronka onartu dio, "herritarrentzako onena denok gura dugula" esanez. Hala ere, beste hainbat herrietan gertatu bezala, hauteskundeen ostean beste alderdiakaz batzar errondarik egin ez izana aurpegiratu dio Urbietari popularrak. "2011n egin zenuten egoera berdintsua eman zenean", esan du Olabarrietak. Bere ustez, hauteskundeak irabazten dituen taldeari dagokio lehen pausua ematea.
Bitartean, bere poza agertu bai, baina, Juan Carlos Martinez PSE-EEko bozeramaileak ez du argitu EAJgaz zer nolako harremana edukiko duten aurrerantzean.
Pinosolo
EH Bilduri dagokionez, Arkaitz Fullaondok ere Arruebarrena edukiko zuen buruan banan-banan hauteskunde-kanpainan botatako proposamenak zerrendatu dituenean. "Kiroldegi berria gura dugu", esan du ezkertiarrak; "baina parte-hartzean eta gardentasunean oinarrituta", gaineratu du, "beste Pinosolo bat" ez dutela gura aipatzeko. Hori dela eta, udal webgunearen bitartez gardentasunaren ataria (non esleitzen diren proiektuen datuak agertuko liratekeen) eta Kode Etikoa martxan jartzea eskatu du Fullaondok. Gogoratu Pinosoloko proiektuari buruzko ikerketa batzordeak "ustelkeria zantzu garbiak" azaleratu zituela 2014ko azaroan. Eneko Arruebarrena alkate ohia eta Jon Loizaga Kirol zinegotzi ohia lotzen ditu ustezko irregulartasunakaz. "Kutunkeria" susmoak tarteko, birritan esleitu behar izan zituzten kiroldegia altxatzeko lanak.
Besteak beste, herenegun Eusko Legebiltzarrak ez zuen onartu Arruebarrena Metro Bilbaotik "berehala kaleratzeko" eskatzea, EAJk eta PSE-EEk UPyDk aurkeztutako proposamenaren kontra bozkatu ostean. Eusko Jaurlaritzaren Etika Publikoaren Batzordearengan utzi dute erabakia. Bere aldetik, Joseba Zorrilla legebiltzarkide jelkideak adierazi zuen Arruebarrena ez dutela auziperatu, Pinosolo kiroldegiko proiektuaren inguruan sortutako susmoak direla-eta. Alkate ohiaren "errugabetasun presuntzioa errespetatzea" eskatu zuen. Bere berbetan, "joan den maiatzaren 24ko udal hauteskundeetan Leioako EAJren kudeaketa zintzoa eta eraginkorra balioztatu zuten herritarrek; auzo denetan irabazi zuen". Gaur eztabaidetan ez du sartu gura izan Mari Carmen Urbieta alkateak, "horretarako eguna ez delako".
Aldaketa
Amaitzeko, "ondo dauden gauzak hobetzeko eta txarto daudenak aldatzeko" lan egingo dutela adierazi du Ruben Belandia Esnatu Leioako ordezkariak. Horren harira, aipatutako taldeak udalean aurkeztutako lehenengo proposamena mahaigaineratu du Ahal Duguren (Podemos) ingurukoak. Neska-mutilentzako UDA aisialdi programa hilabete osoz luzatzea eskatu du, baita parte hartzen duten haur denei bazkaltzen ematea, "hozkailu asko hutsik daudelako leioaztarren etxeetan". Aldaketarik ezean, uztaileko hamabostaldi bakoitzean txanda bat egingo dute UDA egitasmoaren barruan.
Udal kontuetan berria dela gogoratu behar izan diote Belandiari, bere ustez ordaindu ezinik argia moztu dieten leioztarrak daudelako. Urbieta alkateak berak baieztatu dio horrelakorik ez dela gertatu azken urteetan.