‼️🛣️Bizkaiko Foru Aldundiak itsasadarraren azpian, #Getxo eta #Leioa eta Portugalete artean, egin gura duen tunelaren proiektua geldiarazteko plataforma aurkeztu dute gaur Artatza parkean. pic.twitter.com/50C5Y6k7dq
— Hiruka (@HirukaEus) March 19, 2024
Bizkaiko Foru Aldundiak itsasadarraren azpian egin gura duen tunelaren proiektuaren aurka daudela adierazteko bat egin zuten atzo jatorri askotako dozenaka herritarrek. Artatza parkean batu ziren Subflubiala Ez plataforma aurkeztu eta beraien arrazoiak zerrendatzeko, eta hurrengo asteetan mobilizazioak egingo dituztela ere iragarri zuten: apirilaren 28an bizikletada bat egingo dute eta ekainaren 15ean manifestazioa.
Atzoko elkarretaratzean ohartarazi zutenez, Aldundiak hurrengo irailean hasi gura ditu lanak, eta horiek gutxienez lau urte iraungo dute. "Horietan, Artatza parkeko 3,5 hektarea inguru kaltetuko lirateke, oinezkoentzako lurpeko hiru pasabide kenduko lirateke, Artaza-Romo Institutuko patioaren zati bat hartuko litzateke, eta zarata eta kutsadura (indusketak, kamioien trafikoa...) nabarmen handituko lirateke, besteak beste", iragarri zuten deitzaileek.
Halaber, deitoratu zuten 450 milioi euro baino gehiagoko kostua izango duen proiektuak berak aitortzen duela inguruko trafikoa % 33 areagotuko duela, eta garraio pribatuaren erabilera bultzatuko duela, garraio publikoari eta bizikletari lehentasuna eman beharko litzaiekeen bitartean.
