Barrikako San Juan jaiak ekainaren 19an hasiko badira ere, aste akabu honetan ekitaldirik ez da faltako herrian. Zapatuan, hilak 13, ibilbide herrikoiak egingo dituzte, 09:30ean (13 kilometro) eta 11:00etan (3,5 kilometro), Golfo Norte tabernako aparkalekutik abiatuta. Egunean bertan ere izena eman daiteke aipatutako lekuan, 08:00etatik aurrera. Ibilaldiaren ostean, 12:00etan, pintxo-poteo herrikoia egingo dute.
Egun berean, Barrikako paisaiarik ederrenak irudikatzeko aukera edukiko dute 17 urtera arteko margolari gazteek. Lehiaketa 12:00etatik 14:00etara egingo dute, Iparralde tabernako aparkalekuan. Hainbat kategoria egongo dira, adinaren araberakoak, eta kategoria bakoitzeko, hiruna sari.
Domekan, argazki-rallyan ibiliko dira hilaren 10a baino lehen izena eman zuten lehenengo 50 lagunak. Goizeko 10:00etan hasita, 45 minuturik 45 minutura gai bat iragarriko die antolakuntzak. Parte-hartzaileek lau argazki aukeratu (gai bakoitzeko, bat), eta laurak memoria-txartel batean aurkeztu beharko dituzte, 13:45ak baino lehen, frontoian. Ekainaren 21ean banatuko dituzte lehiaketen sariak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.