Eguerdiko 12:30ak aldera izan den itzalaldi masiboak argindarrik gabe utzi ditu eskualdeko udalerri guztiak. Etenaldiak zerbitzu guztiei eragin die, hala nola garraio publikoari, semaforoei, komunikazio-sareei, negozioei eta lantegiei, eta ez dira gutxi izan Bilboko metroan zein eraikinetako igogailuetan geldirik eta harrapatuta gelditu direnak.

Eguerdiko 12:30ak jo orduko, argindarrik gabe gelditu da Uribe Kosta osoa, iberiar penintsulari eta Frantziako hegoaldeari eragindako itzalaldi masiboaren ondorioz. Horrek kaosa eragin du leku guztietan: komertzio ugarik pertsianak jaitsi behar izan dituzte; Bilboko metroa zerbitzuz kanpo gelditu da; errepideetako semaforoak amatatuta egon dira hainbat orduz; komunikazio-sareak zerbitzuz kanpo egon dira eta pertsona ugari igogailuetan harrapatuta gelditu dira, besteak beste. Hala ere, apurka-apurka, badirudi normaltasuna berreskuratzen ari dela.