COVID-19 gaitzagaz kutsatutakoen kopuruak gora egin du etengabe egunotan. Eskualdeko zaharren egoitzen datuek ere alarma piztu dute: 5 kutsatu atzeman dituzte Getxoko Beato Domingo Iturrate egoitzan; Urdulizko Santamariñen, aldiz, 17 erabiltzaileen artean. Azkenengo horretan, 6 profesionalek ere eman dute positibo, azkenengo datuek jakinarazi dutenez. Barrika Barri egoitzan, bere aldetik, erabiltzaile denek jaso dute Pfizerren bigarren txertoa.

Gaur, eguaztenean, berreskuratzekoa zen Plentzia eta Urduliz arteko metro-zerbitzuak etenda jarraituko du, kontrakoa esan arte. Hala, autobus-zerbitzua segituko du inguru horretan. Joan den urtarrilaren 5ean utzi zuten alde bien arteko joan-etorria bertan behera, trenbidearen ondoko mendi-magal batean luizi bat egon ondoren.