Atzo, astelehenean, COVID-19agaz kutsatutako 265 kasu atzeman zituzten EAE osoan 5.274 PCR proba egin ondoren, Eusko Jaurlaritzako Osasun Sailak emandako datuen arabera. Horietatik denetatik, 29 kasu positibo Uribe Kostakoak dira: 2 Berangon, 14 Erandion, 8 Getxon, 2 Leioan, 2 Lemoizen eta 1 Sopelan. Hala, denera, konfinamendua arintzeko faseei ekin genienetik koronabirusagaz kutsatutako 382 uribekostar identifikatu dituzte, gaur egunera arte. Gehienak joan den uztailaren 11tik aurrera jazo dira. Nekane Murga sailburuak adierazi du "bigarren olatua" izan daitekeela azken egunotan bizitzen ari garen positiboen gorakada.

Barrikako Golfo Norte taberna itxi dute bertako langile batek COVID-19 detektatzeko PCR proban positibo eman ondoren. Lokala itxita mantenduko dute gune denak desinfektatu arte. Horren arduradunek ohar baten bidez azaldu dutenez, enpresa espezializatu bat kontratatu dute gaur bertan desinfekzio-beharrak egiteko.