Aurten, azaroaren 18tik abenduaren 2ra izango da Euskaraldia, eta daborduko ahobizi edo belarriprest roletan parte hartu gura duten herritarrek eman dezakete izena Euskaraldiaren webgunean. Aurreko edizioetan izena eman zutenek, parte hartzea berretsi baino ez dute egin beharko. Atzo Bilbon egindako aurkezpenean, antolatzaileek azaldu zutenez, "beste behin ere, lortu nahi dugu herritarren hizkuntza ohituretan eta praktika linguistikoetan euskarak gero eta leku zabalagoa izan dezan”.

Bizkaiko Ahaldun Nagusi Unai Rementeriak gaur politika orokorrari buruzko berbaldian iragarri duenez, itsasadarraren azpiko tunelak Bilboko metroko linea biak lotuko ditu, Sestaoko eta Areetako geltokien artean. Orain 25 minutu inguru behar izaten dira leku batetik bestera mugitzeko, eta konexio berri horregaz, lau minutu ingurukoa izango dela iragarri du. Horretarako, 185 milioi euro inbertituko dituzte.