Uribe Kostako Mankomunitateak Eskola Agenda 2030eko logo lehiaketa martxan jarri du. Helburu nagusia da Agenda 2030 zerbitzuaren irudia izango dena diseinatzea. Hurrengo zentroetako ikasleek parte har dezakete: Ander Deuna Ikastolakoek, DBH 1etik aurrera; Sopela BHIkoek eta Uribe Kosta BHIkoek. Ideiak aurkezteko epea otsailaren 28an bukatuko da.

Eguraldia lagun izan ez zuten arren, Berango-Merana eskolako hainbat ikaslek eta gurasok urtarrilaren 15erako jarritako hitzorduari jarraituta, Munarrikolandako bunkerrak eta inguruak garbitu eta hainbat haritz landatu zituzten. Azaldu dutenez, azpiegituraren barrualdea eta eskailerak atondu zituzten, 10 zaku zabor batuta. Ondoren, Sopela, Urduliz eta Berango udalerrien arteko mugan, Euskal Herriko mapa irudikatu eta zazpi haritz landatu zituzten horren inguruan, euskal probintziako bana. Azkenik, euriari eta hotzari aurre egiteko hamaiketako "arina" jan, indarrak batu eta etxerako buelta egin zuten ekintzaileek, "eguneko intentzioak burututa". Hona hemen egun horretako irudi batzuk.