Kirolak  Barrika 2017-09-08 18:37

Oihan Aizpuru 16. postuan amaitu da Munduko SUP Txapelketan

Oihan Aizpuru surflari barrikoztarra pasa den eguaztenean estreinatu zen Munduko SUP Txapelketan, Danimarkako Cold Hawaiiko uretan. 18 urteko gazteak 16. postua erdietsi zuen atzo, SUP Surfing modalitateko final-laurdenetara sailkatu ondoren. "Nire lehenengo munduko txapelketa izateko oso gustura egon naiz egindako lanagaz", azaldu zuen Aizpuruak, irribarretsu.

Oihan Aizpuru 16. postuan amaitu da Munduko SUP Txapelketan
Aizpuru, atzoko saioan. © SEAN EVANS - ISA | Ikusi handiago | Argazki originala

Aizpuru 6 urte zituela hasi zen surf egiten, Sopelan. Orain dela urte bi ekin zion lehen aldiz SUP modalitateari, Zane Schweitzerrek Hawaiin erakutsi ondoren. Gaztea izan arren, daborduko, bere historia sariz beteta dago. Hala, gazte-mailako Espainiako txapeldunordea izan zen orain dela bi urte, eta Espainiako txapelduna ere izan da maila absolutuan. Horri Europako 5. postua eta munduko 16.a gehitu behar zaizkio.

Westdorp eta Diniz, txapeldun

Proba Shakira Westdorp australiarrak eta Luiz Diniz brasildarrak irabazi zuten. Westdorpek iaz Fijin lortutako urrezkoa berretsi zuen. Australiarrak azpimarratu zuen "emakumezkoek erakutsi duten maila SUP Surfing Txapelketa honetan izugarria" izan zela eta, hala "irabazi izana benetan oso berezia" egin zitzaiola: "ezin harroago nago!". Dinizen kasuan, ostera, ezustekoa izan zen bere garaipena, lehiakide berria eta ezezaguna baitzen. Azaldu zuenez, asko kosta zitzaion Danimarkara bidaiatzeko babeslerik topatzea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa