Euskararen Eguna ospatuko dute domekan Barrikan

Monda Lironda pailazoek antzezlana egingo dute arrastian. © MONDA LIRONDA

Euskararen Eguna da abenduaren 3a; hala ere, Barrikan azaroaren 26ra aurreratu dituzte gure hizkuntzaren aldeko ekintzak. Hartara, domekan askotariko jarduerak egingo dituzte udalerrian euskarari gorazarre egiteko.

Eguerdiko 12:00etan ipini dute lehenengo hitzordua, Iparralde tabernan. Handik hasiko dute trikiti-poteoa, Joseba eta Victor trikitilarien eskutik. Ostean, herri-bazkaria egingo dute Nagusien Etxean, 14:00etatik aurrera. Menu bi egongo dira aukeran, nagusientzakoa eta umeentzakoa, 15 eta 6 euroan, hurrenez hurren.

Arrastian, 18:00ak aldera, Monda Lironda pailazoek "Rol Jokoa" antzezlana taularatuko dute, hori ere Nagusien Etxean bertan, ume denen gozamenerako. Azkenik, euskararen aldeko ekitaldiei ginga ipintzeko asmoz, eta udagoieneko iluntzeetako hotzari aurre egiteko ere bai, txokolate bero-beroa banatuko dute hori gura duten barrikoztar denen artean.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun