Osoko bilkurak arratsaldetik goizetara aldatzea salatu du EH Bilduk

Barrikako Udaletxea.

"Gardentasunari eta parte-hartzeari" oztopoak ipintzea leporatu dio EH Bilduk Barrikako alkateari eta EAJren gainerako zinegotziei, osoko bilkuren ordutegia aldatu eta arratsaldez beharrean goizez ipintzeagatik, oposizioko zinegotziei, lana dela eta, ordutegi horrek joatea eragozten diolako.  

EH Bilduren esanetan, ordutegia aldatzea erabaki zenean talde horretako zinegotziek adierazi duten ezinezkoa zitzaiela ordu horretan bilkuretara joatea, lan-arrazoiengatik. Gaur egun, bi hilean behin egiten dira barrika osoko bilkurak, hileko lehenengo eguazteneko 09:00etan.

Goizez egindako lehenengo bilkuran oposizioko zinegotzi denak kexatu direla azaldu du EH Bilduk (bai bere hirurak bai iBarrikako bakarra), baina alkateak kexa horiek aintzat hartu ez eta goizeko ordutegia behin betikoa izatea ezarri zuela. Modu horretan herritar askori bilkuretara joan eta "euren ordezkari politikoen erabakiak bertatik bertara ezagutzeko" aukera ukatzen zaiela ere salatu dute.

"Udalaren helburuetako batek herritarren parte-hartzea sustatzea izan beharko lukeen arren, ikusten da EAJ ez dagoela prest fiskalizatua izateko", dio EH Bilduk kaleratutako oharrak. "Horrenbestez, nekez pentsa daiteke gobernu-talde honek parte-hartzearen eta gardentasunaren alde egingo duenik, haren jokabideek adierazten badute interes gutxi dutela gainerako udalkideen edo Barrikako bizilagunen presentziarekiko".

HIRUKAk galdetuta, Roberto Muñoz Barrikako alkateak adierazi du ez duela gai horretaz ezer esateko.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun